Azərbaycan, Bakı, 9 oktyabr /Trend, müxbir A.Axundov/
"Aqrarkredit" QSC dövlət bank olmayan kredit təşkilatının banka çevrilməsi zərurəti saxlanılır. Bu barədə çərşənbə axşamı Trend-ə Azərbaycan Mərkəzi Bankının (AMB) baş direktoru Rəşad Orucov deyib.
"Bu məsələ qalır, hazırda onun həllinin mümkün variantı müzakirə edilir. AMB olaraq, biz bu barədə müraciət olacağı təqdirdə baxmağa hazırıq. Hələlik belə müraciət yoxdur", - Orucov qeyd edib.
Onun sözlərinə görə, belə bankın yaradılması üçün ölkə hökumətinin qərarı lazımdır.
"Onun hansı formada yaradılacağını düşünmək lazımdır. Bildiyimiz qədərilə hazırda məsləhətləşmələr aparılır", - Orucov bildirib.
"Aqrarkredit" QSC-nin idarə heyətinin üzvü Süleyman Kələşov çərşənbə axşamı Trend-ə bildirib ki, hazırda "Aqrarkredit"in banka çevrilməsi məsələsi öz aktuallığını saxlayır.
"Biz də hesab edirik ki, belə ixtisaslaşmış banka ehtiyac var. Belə bank bir çox ölkələrdə var. Bu sahədə işlər aparılır, lakin bu məsələ hökumət səviyyəsində həllini tapmalıdır", - o qeyd edib.
