Azərbaycan, Bakı, 27 noyabr /Trend, müxbir A.Axundov/
Azərbaycan sığorta şirkətlərinin 2012-ci ilin yekunu üzrə sığorta yığımlarının ümumi həcmi 300 milyon manatdan çox olacaq. Bu barədə Azərbaycan Maliyyə Nazirliyi yanında Dövlət Sığorta Nəzarəti Xidmətinin (DSNX) rəhbəri Namiq Xəlilov çərşənbə axşamı jurnalistlərə bildirib.
Onun sözlərinə görə, ilin sonuna icbari sığorta növlərinin payı 30-35 faiz səviyyəsində olacaq.
"Bu il bazarın artım lokomotivi könüllü növlərin də inkişafına təkan verən icbari sığorta olub. Məsələn, indi sığortanın gəlirli növü olan avtonəqliyyat vasitəsi sahiblərinin mülki məsuliyyətinin icbari sığortası (AVSMMİS) tədricən ziyanlı olacaq. Lakin AVSMMİS üzrə iş paralel olaraq gəlirli nəqliyyat vasitəsi sahiblərinin mülki məsuliyyətinin könüllü sığortası (KASKO) üzrə polisləri satmağa imkan verir. Bunun hesabına AVSMMİS-in zərərliliyi ödənilir və ümumilikdə şirkətlərin avtomobillərin sığortasından gəliri təmin olunur", - Xəlilov deyib.
Onun sözlərinə görə, gələn il icbari sığorta bazarının artımı sabitləşdiriləcək.
"Ümumi sığorta bazarının artması builki kimi belə böyük olmayacaq, lakin artım olacaq. Biz mövcud müştəri bazası əsasında başqa gəlirli məhsulların satışını genişləndirmək barədə daha çox düşünməyə başlayacağıq", - Xəlilov bildirib.
