Azərbaycan, Bakı, 10 dekabr / Trend, müxbir A.Axundov /
Azərbaycanın sığorta bazarında son islahatlar vaxt ötdükcə yerli kapital bazarında sığorta şirkətlərinin aktivlərinin payını artırmağa imkan verəcək. Bu barədə Avropa Yenidənqurma və İnkişaf Bankının (AYİB) "Transition Report 2012" hesabatında deyilir.
2011-ci ilin sonunda Azərbaycanda "Sığortanın icbari növləri haqqında" qanun qüvvəyə mindi. 2011-ci ilin noyabrında bu qanun çərçivəsində İcbari Sığorta Bürosu yaradıldı, 2011-ci ilin dekabrdan sığorta şirkətləri bu qanunla tənzimlənən icbari sığortanın dörd növü (avtomobil nəqliyyatı vasitələri sahiblərinin məsuliyyətinin icbari sığortası, daşınmaz əmlakın sığortası, daşınmaz əmlakın istismarı vaxtı məsuliyyətin icbari sığortası, sərnişinlərin icbari sığortası) üzrə fəaliyyətə başladı.
"Bu islahatlar ölkənin sığorta bazarının həcmini artıracaq və yerli kapital bazarında sığorta şirkətlərinin aktivlərinin payını yüksəldəcək", - hesabatda deyilir.
AYİB-in fikrincə, Azərbaycanda kapital bazarının inkişafına həmçinin bankların kapitalına tələbin beşqat artımı da təsir edəcək.
"Yeni normalar Azərbaycan banklarının əsas mövqelərini gücləndirməlidir", - hesabatda deyilir.
Azərbaycanda 43 bank, 28 sığorta və bir təkrar sığorta şirkəti fəaliyyət göstərir.
