Azərbaycan, Bakı, 25 dekabr /Trend müxbir T.Cəfərov/
Cari ilin (İranda il martın 21-də dəyişir) ilk səkkiz ayı ərzində İrandan Azərbaycana 384 milyon dollar həcmində məhsul ixrac olunub. Bunu İranın Bakıdakı səfirliyinin ticarət məsələləri üzrə müşaviri Fərəc Şəhidi Trend-ə deyib.
Onun sözlərinə görə, ötən ilin eyni dövrü ilə müqayisədə ixracatın həcmi 18,15 faiz artıb.
Şəhidi ilin sonunadək İrandan Azərbaycana ixracın həcminin 600 milyon dollara qədər artacağına ümidvar olduğunu bildirib.
Müşavir İrandan Azərbaycana ixrac olunan malların əsasən sement, klinker, kartof, neft-kimya məshulları, tikinti materialları və ərzaq məhsulları olduğunu qeyd edib.
Onun sözlərinə görə, Azərbaycandan İrana isə cari ilin səkkiz ayı ərzində 37 milyon dollar dəyərində əsasən polad, dəmir, taxta kimi məhsullar ixrac olunub.
Şəhidi deyib ki, İran və Azərbaycan arasında ticarət sahəsində əlaqələr hər gün inkişaf etməkdədir. "Azərbaycan İranın qeyr-neft sektoruna aid məhsulların ixrac olunduğu ölkələr sırasında 11-ci yerdədir",- Şəhidi bildirib.
