Azərbaycan, Bakı, 22 yanvar /Trend, müxbir A.Axundov/
Azərbaycan hökuməti yaxın perspektivdə sadələşdirilmiş vergiqoyma sistemindən imtina etməyi planlaşdırmır. Trend-in məlumatına görə, bu barədə çərşənbə axşamı vergilər nazirinin birinci müavini Natiq Əmirov mətbuat konfransında deyib.
"Sadələşdirilmiş vergi rejiminin ləğvi məsələsi yaxın gələcəkdə hökumətin gündəliyinə daxil deyil. Lakin bu, xüsusilə, xidmətlər sahəsinə aiddir, ortamüddətli perspektivdə bu rejimin ləğv edilməsi və ya onun başqa formada tətbiqi məsələsi nəzərdən keçirilə bilər", - Əmirov qeyd edib.
Onun sözlərinə görə, sahibklarların bu rejimə münasibəti birmənalı deyil.
"Yaxın vaxtlaradək sadələşdirilmiş vergi rejimi 150 min manatadək dövriyyə ilə hüquqi şəxslərə və 90 min manatadək dövriyyə ilə fiziki şəxslərə tətbiq edilirdi. Sahibkarların sadələşdirilmiş vergiqoyma rejiminə münasibəti müxtəlifdir. Bəziləri hesab edirlər ki, onu ləğv etmək lazımdır, digərləri isə əksinə, saxlamağın lehinədirlər. Sahibkarlarla görüşlərdən sonra ümumi qənaətə gəldik ki, bu planka fiziki və hüquqi şəxslər üçün eyni olsun və 120 min manat səviyəsində müəyyənləşdirilsin. Bu, 2013-cü ildən qüvvəyə minən Vergilər Məcəlləsinə dəyişikliklərdə öz əksini tapdı", - Əmirov vurğulayıb.
