Azərbaycan, Bakı, 12 mart /Trend, müxbir E.İsmayılov/
Əlverişsiz hava şəraiti ilə əlaqədar olaraq, "Azərbaycan Hava Yolları" tərəfindən (AZAL) həyata keçirilən Paris-Bakı aviareysi yubanır. Bu barədə Trend-ə çərşənbə axşamı Heydər Əliyev Beynəlxalq Hava Limanından bildiriblər.
Hava limanından deyiblər ki, cədvələ görə, təyyarə yerli vaxtla saat 19:35-də Bakıya çatmalı idi, lakin əlverişsiz hava şəraiti ilə əlaqədar təyyarənin Parisdən uçuşu təxirə salınıb.
"Təyyarənin Parisdən dəqiq uçuş vaxtı məlum deyil", - aeroportdan bildiriblər.
Bundan başqa, hava limanından məlumat veriblər ki, uçuş cədvəlinə edilən dəyişikliklərlə əlaqədar olaraq, Bakı-İstanbul (Sabiha Gökçen aeroportu) reysi də təxirə salınıb.