Azərbaycan, Bakı, 21 iyun /Trend, müxbir A.Axundov/
Hazırda Maliyyə Nazirliyi məcburi kənd təsərrüfatı sığortasının tətbiqi məsələsini nəzərdən keçirmir.
Trend-in məlumatına görə, bu barədə Maliyyə Nazirliyi yanında Dövlət Sığorta Nəzarəti Xidmətinin rəhbəri Namiq Xəlilov Rumıniyanın PR şirkətinin dərc etdiyi və Azərbaycanın sığorta bazarına həsr edilmiş "Media XPRIMM" jurnalına müsahibəsində deyib.
Jurnalın xüsusi buraxılışı iyunun 20-21-də Bakıda keçirilən IV Beynəlxalq Sığorta Forumuna həsr edilib.
Xəlilov bildirib: " Biz bu növ sığorta mükafatlarının müəyyən hissəsinin dövlət tərəfindən subsidiya verilməsi sisteminin optimallaşdırmasına istiqamətlənmişik. Biz kifayət qədər uğurlu modellər təqdim edən beynəlxalq təcrübəni öyrənirik".
Bununla yanaşı Dövlət Sığorta Nəzarəti Xidməti ən münasib modellər kimi dövlət və özəl sektorun əməkdaşlığı prinsiplərinə əsaslanan modellər hesab edir.