Azərbaycan, Bakı, 6 avqust /Trend/
2013-cü il iyulun 1-nə olan vəziyyətə görə, Azərbaycan bankları ötən ilin müvafiq dövrünün göstəriciləri ilə müqayisədə milli və xarici valyutada kreditlər üzrə faiz dərəcələrini aşağı salıblar.
Trend-in Azərbaycan Mərkəzi Bankının (AMB) yenilənmiş statistik hesabatına istinadən verdiyi məlumata görə, milli valyutada Azərbaycan iqtisadiyyatının bank kreditləşməsi üzrə orta faiz dərəcəsi 14,21 faiz olub. Bu rəqəm 2012-ci il iyulun 1-də isə 15,65 faizə bərabər olub. Sərbəst dönərli olunan valyutada (SDV) bank kreditləşməsi üzrə orta faiz dərəcəsi 14,71 faiz təşkil edib. 2012-ci ilin iyul ayının əvvəlinə bu göstərici 15,44 faiz olub.
2013-cü il iyulun 1-nə milli valyutada hüquqi şəxsin bank kreditləşməsi üzrə orta faiz dərəcəsi 11,6 faiz olub. Ötən il iyulun 1-də isə bu göstərici 13,74 faiz təşkil edib. SDV-də korporativ müştərinin bank kreditləşməsi üzrə orta faiz dərəcəsi 11,18 faiz olub. 2012-ci il iyulun əvvəlinə bu rəqəm 12,62 faiz təşkil edib.
2013-cü il iyulun 1-nə milli valyutada fiziki şəxsin bank kreditləşməsi üzrə orta faiz dərəcəsi 18,05 faiz olub. Ötən il iyulun 1-də isə bu göstərici 18,49 faiz təşkil edib. SDV-də fərdi müştərinin bank kreditləşməsi üzrə orta faiz dərəcəsi 21,47 faiz olub. 2012-ci il iyulun əvvəlinə bu rəqəm 21,94 faiz təşkil edib.