Azərbaycan, Bakı, 6 dekabr /Trend/
"Akkord" Korporasiyası tərəfindən buraxılmış 50 milyon manatlıq korporativ istiqrazlardan 15 milyon manat məbləğində istiqraz "AtaBank" Açıq Səhmdar Cəmiyyəti, 3 milyon manat məbləğində istiqraz isə "Azərbaycan Beynəlxalq Bankı" ASC tərəfindən əldə edilib və müvafiq olaraq yerləşdirilib. Bu barədə Trend-ə korporasiyadan məlumat verilib.
Xatırladaq ki, buraxılışı Qiymətli Kağızlar Üzrə Dövlət Komitəsi tərəfindən 4 noyabr 2013-cü il tarixdə qeydiyyata alınmış "Akkord" Korporasiyasının korporativ istiqrazlarının ikinci emissiyası çərçivəsində hər birinin nominal dəyəri 1 000 manat, məcmu nominal dəyəri 50 milyon manat, gəlirlik dərəcəsi isə 11,75% təşkil edən 50 min ədəd istiqrazlar dövriyyəyə buraxılıb.
Yerləşdirilməsi Bakı Fond Birjasında kütləvi təklif üsulu ilə həyata keçiriləcək istiqrazların dövriyyə müddəti 3 il təşkil edir.
"Akkord" Korporasiyasının buraxdığı istiqrazların satışının təşkil edilməsi məqsədilə market-meyker qismində "Azərbaycan Beynəlxalq Bankı" ASC çıxış edir.