Azərbaycan, Bakı, 11 dekabr /Trend, müxbir E.Əliyev/
Kredit sığortası Azərbaycanda bazarın inkişafının perspektiv istiqamətidir. Trend-in məlumatına görə, bu barədə jurnalistlərə Maliyyə Nazirliyi yanında Dövlət Sığorta Nəzarəti Xidmətinin rəisi Namiq Xəlilov bildirib:
"Kredit sığortası xidmətlərinin göstərilməsi ölkənin sığorta şirkətlərinin və kommersiya banklarının birgə işinin nəticəsidir. Kreditləşmə inkişaf edir və təbii ki, sığorta bazarına da toxunmağa başlayır. Bəzi şirkətlər artıq mənim kifayət qədər perspektivli hesab etdiyim bu istiqamətdə hərəkətə keçiblər".
Onun sözlərinə görə, eyni zamanda, sığortanın inkişafı agentlərin fəaliyyətinə nəzarətin inkişafına da ehtiyac yaradır:
"Bu günədək agent fəaliyyəti üçün 800 lisenziya verilib, lakin onların sahiblərinin heç də hamısı aktiv fəaliyyətlə məşğul deyil. Parlamentin qəbul etdiyi "Sığorta fəaliyyəti haqqında" qanundakı dəyişikliklərdə nəzərdə tutulan sığorta agentlərinin müntəzəm hesabatlılığı prinsipinin tətbiqi ilə mənzərə daha da aydınlaşacaq. Biz real çalışan agentlərin sayı və işdə üstünlük verilən sığorta növləri barədə daha dəqiq informasiyaya malik olacağıq ki, bu da müsbət amildir".
