Azərbaycan, Bakı, 21 yanvar /Trend, müxbir A.Axundov/
2013-cü il Azərbaycanın sığorta bazarının yalnız icbari sığorta hesabına artacağına dair proqnozları təkzib etdi. Maliyyə Nazirliyi yanında Sığorta Nəzarəti Dövlət Xidmətinin rəhbəri Namiq Xəlilov belə hesab edir.
Çərşənbə axşamı Namiq Xəlilov Trend-ə bildirib: "Əgər 2012-ci ildə bazarın əsas artım drayveri icbari sığorta növləri idisə, ötən il bazarımızın artımını əsasən könüllü sığorta təmin etdi. Ötən il könüllü sığorta bazarının həcmi 26 faiz artdığı halda, icbari növlər üzrə artım 5,64 faiz təşkil edib. Bu, 2013-cü ilin əvvəlki ildən əsas fərqlərindən biri oldu. 2014-cü ildə də sığortanın könüllü növləri üzrə yığımların artım sürəti yaxşı olacaq".
2013-cü ilin yekunları üzrə ölkədə fəaliyyət göstərən bütün şirkətlərin mükafatlarının ümumi həcmi 405,68 milyon manat (il ərzində artım 18,44 faiz), hesabat dövrü ərzindəki ödəmələr 122,8 milyon manat həcmində (artım 30,83 faiz) olub.
Dövlət Xidməti rəhbərinin sözlərinə görə, Azərbaycanın sığorta bazarı üçün 2013-cü ilin digər səciyyəvi xüsusiyyəti onun milli iqtisadiyyatın artımını üç dəfə (ötən il ölkədə ÜDM 5,8 faiz artıb) üstələməsi oldu. Nəticədə ÜDM-da sığorta sektorunun xüsusi çəkisi 2012-ci ildəki 0,64 faizdən 2013-cü ildə 0,71 faizə çatıb.
N.Xəlilov qeyd edib: "Bundan başqa, 2013-cü ildə sığorta bazarı az və ya çox dərəcədə bərabər artıb, sıçrayışların olmaması bu artımın böyük vahid sığorta müqavilələri ilə bağlı olmadığından xəbər verir".
Onun sözlərinə görə, həmçinin yığımlarla ödəmələrin nisbəti də artıb. Əgər 2012-ci ildə bu nisbət 27,4 faiz səviyyəsində idisə, ötən il 30,27 faizədək artıb.
