Azərbaycan, Bakı, 28 yanvar /Trend, müxbir E.Əliyev/
Macarıstan şirkətləri, həmçinin arxitektura və mühəndislik sahəsinin mütəxəssisləri "Bakı Ağ Şəhər" layhəsində, eləcə də digər inkişaf layihələrində, o cümlədən tirizm və mehmanxana biznesi sahələrində iştirak etməyə maraq göstərirlər. Trend-in məlumatına görə, bu barədə çərşənbə axşamı Bakıda Azərbaycan və Macarıstan arasında ticari-iqtisadi əməkdaşlıq üzrə hökumətlərarası komissiyanın IV iclasının yekunları üzrə imzalanmış protokolda deyilir.
Macarıstanın xarici iqtisadi əlaqələr üzrə dövlət katibi Peter Siyarto iclasda bildirib ki, Macarıstan şirkətləri, həmçinin 2015-ci ildə Azərbaycanda ilk Avropa Oyunlarının keçirilməsinə hazırlıq çərçivəsində tikinti işlərində iştirak etmək arzusundadırlar.
Sənəddə deyilir: "Hər iki tərəf tikinti, dizayn, montaj, memarlıq abidələrinin yenidən qurulması, nəqliyyat və şəhər infrastrukturunun inkişafı sahələrində əməkdaşlığın genişləndirilməsinin vacibliyini qeyd edirlər".
Digər tərəfdən, tərəflər sosial, tibb və tədris müəssisələrinin tikintisi, qabaqcıl sahə texnologiyalarının tətbiqi, həmçinin tikinti materiallarının istehsalı sahəsində əməkdaşlığa maraq göstərdiklərini ifadə ediblər.
Sənəddə qeyd olunur ki, Macarıstanın Ticarət və İnvestisiyalar Agentliyi "BakuBuild-2014" beynəlxalq sərgisində iştirak etməyi planlaşdırır. Sərgidə Macarıstanı ölkədə fəaliyyət göstərən və Azərbaycan bazarına çıxmaq arzusunda olan şirkətlər təmsil edəcəklər.
