Azərbaycan, Bakı, 20 fevral /Trend, müxbir E.Əliyev/
Azərbaycanda kənd təsərrüfatı kooperativlərinin yaradılması üçün qanunverici baza 2014-cü ilin sonunadək hazırlana bilər. Bunu cümə axşamı Trend-ə Azərbaycan Mikromaliyyə Assosiasiyasının sədri Süleyman Kələşov deyib.
Onun sözlərinə görə, hazırda parlamentdə "Kənd təsərrüfatı kooperasiyaları haqqında" qanun layihəsi üzərində iş gedir: "Bu qanun fermerlərin kənd təsərrüfatı kooperativlərində könüllü birləşməsi üçün mexanizmlər yaradacaq. Bu da öz növbəsində ölkənin regionlarında korporativ müştərilərin sayını artıracaq".
S.Kələşov qeyd edib ki, hazırda belə müştərilərin sayı olduqca azdır, buna görə də ölkədə mikromaliyyələşdirməyə tələbat böyükdür: "Bu qanun layihəsinin müzakirəsi 2011-ci ildən aparılır. Ümid edirəm ki, qanun layihəsi cari ilin sonunadək qəbul olunacaq".
Ekspert dövlət başçısının iri fermer təsərrüfatlarının yaradılması haqqında təşəbbüsünü də vurğulayıb: "Belə təsərrüfatları kollektiv kənd təsərrüfatı istehsalatlarının yaradılması üzrə ilk addım hesab etmək olar. Hələ fermerlər belə birlik alətlərinin onlara verə biləcəyi faydanı tam başa düşmür, lakin əminəm ki, vaxt ötdükcə vəziyyət dəyişəcək".
Qeyd edək ki, "Kənd təsərrüfatı kooperasiyaları haqqında" qanun layihəsi 2011-ci ilin aprelində birinci oxunuşda qəbul olunub. Sənəd istehlak kooperativlərinin yaradılmasını nəzərdə tutur.
