Azərbaycan, Bakı, 14 mart /Trend, müxbir E.Əliyev/
Azərbaycanda avronun məzənnəsinin enib-qalxması ölkə məhsullarının idxal və ixracına təsir etməyəcək. Bu barədə Trend-ə Azərbaycan Mərkəzi Bankından (AMB) deyiblər.
Bank ilin əvvəlində AZN/EUR-un rəsmi məzənnəsini 1 avroya görə 1,0691 manat səviyyəsində müəyyənləşdirmişdi. Fevralın əvvəlində rəsmi məzənnə 1,0577 AZN/EUR səviyyəsinədək azalıb, lakin bu il martın əvvəlinə 1 avroya görə 1,0807 AZN/EUR-dək artıb.
AMB-dən bildiriblər ki, hazırda avronun məzənnəsi AZN/USD və USD/EUR məzənnələrinin "çarpazlaşdırılması" ilə müəyyən edilir: "Buna görə də AZN/USD məzənnəsinin sabitliyi şəraitində avronun məzənnəsinin dəyişməsi USD/EUR məzənnəsinin dinamikasından asılıdır. Avronun manata nisbətdə nəzəri cəhətdən bahalaşması yerli malların rəqabətli (qiymət) üstünlüyünü təmin edir. Eyni zamanda, AZN/EUR məzənnəsi bu və ya digər istiqamətə mütəmadi dəyişir. Ötən ay ərzində avronun 1,8 faiz bahalaşması bu tendensiya ilə əlaqəlidir və böhran dövründən əvvəl avro/manat məzənnəsinin 1,2 faiz olan standart aylıq sapmasını bir az üstələyir. Üstəlik ötən ay ərzində avro nə qədər bahalaşsa da, bu proses əvvəlki iki ayda baş vermiş Avropa valyutasının ucuzlaşmasının qarşısını almır, hazırda müəyyən edilmiş məzənnə ötən il dekabrın ortalarına olan göstəriciləri üstələmir".
Mərkəzi Bankdan qeyd ediblər ki, başqa sözlə, valyuta bazarında belə dəyişkənlik olduqca tez-tez baş verir: "Uzun müddət ərzində məzənnənin ikitərəfli dəyişməsi şəraitində bu dəyişikliklərin idxal və ixraca birmənalı təsiri barədə danışmaq çətindir. Mövcud məzənnə siyasəti makroiqtisadi sabitlik şəraitinə tam cavab verir və xarici valyuta bazarlarında məzənnənin dəyişkənliyi Azərbaycan iqtisadiyyatı üçün narahatlıq törətmir".