Azərbaycan, Bakı, 30 aprel /Trend, müxbir E.Əliyev/
2014-cü ilin yanvar-mart aylarında Gürcüstandan Azərbaycana 79,86 milyon dollar dəyərində 9,51 min minik avtomobili ixrac olunub. Trend-in məlumatına görə, bu barədə Gürcüstan Milli Statistika Xidmətinin hesabatında deyilir.
Qeyd edilən dövrdə bu sahənin xüsusi çəkisi Gürcüstandan Azərbaycana ümumi ixracın həcminin 54,82 faizini təşkil edib.
Ötən ilin analoji dövrü ilə müqayisədə Gürcüstandan ixrac olunan minik avtomobillərinin həcmi 4,73 faiz azalıb, say nisbətində isə 0,23 min ədəd artıb. Müqayisə üçün, 2013-cü ilin I rübündə Gürcüstandan Azərbaycana 83,81 milyon dollar həcmində 9,28 min avtomobil ixrac edilib.
Ölkəyə avtomobil idxalının azalması Azərbaycanın tətbiqinə cari ilin aprel ayının 1-dən başlanan Avro-4 ekoloji standartına keçidi ilə izah edilir. Avro-4-ün tətbiqi Gürcüstandan Azərbaycana idxal olunan nəqliyyat vasitələrinin böyük hissəsini təşkil edən köhnə avtomobillərin ölkəyə gətirilməsini məhdudlaşdırır.
Hesabat dövründə Gürcüstandan Azərbaycana 7,49 milyon dollar dəyərində 1,2 min yük avtomobili idxal edilib ki, bu da ötən ilin analoji dövründə qeydə alınan göstəricidən 28,69 faiz çoxdur (say nisbətində isə 0,42 min ədəd). Müqayisə üçün, 2013-cü ilin yanvar-mart aylarında Gürcüstandan Azərbaycana 5,82 milyon dollar dəyərində 0,78 min yük maşını idxal edilib.
Avtomobillər Gürcüstana xaricdən gətirilir.
Hesabat dövründə Gürcüstandan Azərbaycana ixrac edilmiş malların ümumi dəyəri 145,68 milyon dollar və ya qeyd edilən dövrdə ölkənin ümumi ixracının həcminin 20,9 faizini təşkil edib. 2013-cü ilin eyni dövrünə nisbətən Azərbaycana ixracat 1,48 faiz artıb. Müqayisə üçün, ötən ilin yanvar-mart aylarında Azərbaycana 143,55 milyon dollar dəyərində Gürcüstan malı ixrac edilib.
