...

Bakının mənzil bazarı il ərzində 30 faiz bahalaşıb

Biznes və iqtisadiyyat xəbərləri Materials 6 İyun 2014 19:58 (UTC +04:00)

Azərbaycan, Bakı, 6 iyun /Trend, müxbir Z.Qurbanova/

2014-cü ilin may ayında Bakının daşınmaz əmlak bazarında qiymətlər 1,02 faiz azalıb. Bunu cümə günü Trend-ə "MBA Group" konsaltinq şirkətinin baş direktoru Nüsrət İbrahimov deyib.

Onun sözlərinə görə, ilin əvvəlindən mənzil bazarı 13,6 faiz, ötən ilin eyni dövrü ilə müqayisədə isə 29,9 faiz bahalaşıb: "Cari ilin may ayında təkrar mənzil bazarında qiymətlər 1,78 faiz artıb, ilkin mənzil bazarında isə 4,45 faiz azalıb. Hərçənd illik hesabatda may ayında Bakının ilkin daşınmaz əmlak bazarında qiymətlər 41 faiz artıb".

N.İbrahimov qeyd edib ki, mayda ilkin mənzil bazarında qiymətlərin enməsi daşınmaz əmlak bazarında aktivliyin azalması il əlaqədardır: "Ümumilikdə daşınmaz əmlak üzrə indiki qiymətlər real göstəricilərdən uzaqdır. Buna görə də yaxın 2-3 ayda mənzilin qiymətlərinin nisbi azalması qaçılmaz olacaq, lakin payızda qiymətlərin sabitləşməsi və bir qədər artımı ehtimalı var".

Nəriman Nərimanov prospektində (keçmiş "Sovetski") yaşayış obyektlərinin sökülməsi üzrə işlərin mənzilin qiymətlərinə mümkün təsirinə gəlincə, o bildirib ki, bu, mənzilin qiymətinə təsir edən faktor deyil. Nazirlər Kabinetinin qərarına görə, 1 kvadratmetr yaşayış sahəsinə görə 1500 manat kompensasiya verilir. "Sovetski"də təqribən 10 min ailə yaşayır.

N.İbrahimov deyib ki, "Sovetsk"də mənzilə görə kompensasiyanın məbləği Bakının mərkəzində mənzil almaq üçün kifayət etmir: "Kompensasiyanın orta məbləği 60 min manatdır, bu pula ən yaxşı halda şəhərin ətrafında ikiotaqlı mənzil almaq olar. Buna görə də bu, ümumilikdə mənzilin qiymətinə təsir etməyəcək. Lakin bunu torpağın qiymətləri barədə demək olmaz. Torpaq qiymətləri bununla əlaqədar nisbətən artacaq. Mayda torpaq bazarında qiymətlər təqribən 2 faiz azalıb, ilin əvvəlindən isə 10 faiz artıb".

Məqalədə:
Xəbər lenti

Xəbər lenti