Azərbaycan, Bakı, 25 avqust /Trend, müxbir Zülfiyyə Qurbanova/
2014-cü ilin II rübünün yekunları üzrə "Azərbaycan Beynəlxalq Bankı - Gürcüstan" SC törəmə strukturunun aktivləri 112,87 milyon lari olub. Bunu bazar ertəsi Trend-ə Gürcüstan Mərkəzi Bankından deyiblər.
Bankın aktivləri il ərzində 28,5 faiz azalıb. Ötən ilin II rübünün sonuna bu göstərici 157,9 milyon lari təşkil etmişdi.
Bankın aktivlərinin 30 faizindən çoxu azad konvertasiya edilə bilən valyutada, 66 faizi isə (74,52 milyon lari) laridə yerləşdirilib. Pul vəsaitləri və onların ekvivalentlərində "ABB - Gürcüstan" 1,84 milyon lari toplayıb ki, bu da 2013-cü il iyulun 1-nə olan vəziyyətdən 75,2 faiz çoxdur.
Bankın kredit portfeli il ərzində 25,5 faiz azalaraq 94,78 milyon lari təşkil edib. Müqayisə üçün, 2013-cü ilin iyun ayının nəticələri üzrə bu göstərici 127,3 milyon lari təşkil edib. Bankın verdiyi kreditlərin 25 faizdən çoxunu milli valyutada (26,35 milyon lari) olan borclar təşkil edir, azad konvertasiya edilə bilən valyutada isə 68,43 milyon lari ekvivalentində kredit ayrılıb. Bankın kredit portfeli strukuturunda ehtiyatların həcmi bu ilin iyun ayının nəticələri üzrə 10,86 milyon lari təşkil edib.
Hesabat dövründə bankın öhdəliklərinin ümumi həcmi il ərzində 35,7 faiz azalaraq 85,36 milyon lari olub. Passivlər strukturunda cari hesab və depozitlər qismində yerləşdirilən vəsaitlər il ərzində təqribən 62,6 faiz azalaraq 3,58 milyon lari təşkil edib. Bank 4,93 milyon lari məbləğində təcili depozit cəlb edib, bundan azad konvertasiya edilən valyutada əmanətlərin payı 4,86 milyon lari, milli valyutada depozitlərin məbləği isə təqribən 72 min lari olub.
İl ərzində bankın nizamnamə kapitalı dəyişməyərək cari ilin iyun ayının sonuna 22,69 milyon lari olub. Bankın məcmu kapitalı 27,51 milyon lari (o cümlədən 4,8 milyon lari həcmində bölüşdürülməyən gəlir və aktivlərin təkrar qiymətləndirilməsindən 51,93 min lari) təşkil edərək il ərzində 9,8 faiz artıb. Müqayisə üçün, 2013-cü ilin II rübünün sonuna bu göstərici 25,05 milyon lari olub.
Bank təqribən 2,8 milyon lari məbləğində faizli xərclərlə 6,03 milyon həcmində məcmu faizli gəlir əldə edib. Bununla da cari ilin II rübünün nəticələri üzrə bankın xalis faizli gəliri 3,22 milyon lari olub. Bu, ötən ilin eyni dövründə əldə olunan gəlirdən (4,26 milyon lari) 24,4 faiz azdır.
Bank II rübü 1,33 milyon lari həcmində xalis gəlirlə başa vurub. Gəlirlərin həcmi il ərzində təqribən 2,5 dəfə artıb.
Gürcüstan Mərkəzi Bankının avqustun 25-nə olan məzənnəsi 1,7252 GEL/USD təşkil edir.