Azərbaycan, Bakı, 29 avqust /Trend, müxbir Zülfiyyə Qurbanova/
Azərbaycan və Dünya Bankı (DB) arasında əməkdaşlıq başlayandan 3,786 milyard dollar məbləğində kredit sazişləri imzalanıb. Trend-in məlumatına görə, bu barədə DB-nin 2014-cü ilin I yarısının nəticələri üzrə hesabatında deyilir.
Hesabata əsasən, 70 faiz (2,658 milyard dollar) Beynəlxalq Yenidənqurma və İnkişaf Bankının (DB qrupuna daxildir), 29,8 faiz isə (1,128 milyard dollar) Beynəlxalq İnkişaf Assosiasiyasının xətti ilə ayrılmış kreditlərin payına düşür.
Ləğv edilmiş vəsaitlərin ümumi məbləği 199,08 milyon dollar olub ki, bu da ölkədə bankın ümumi portfelinin 5,3 faizini təşkil edir.
Hazırda DB-nin mənimsənilmiş vəsaitlərinin məbləği 2,232 milyard dollar təşkil edir ki, bunun da 1,254 milyard dolları Beynəlxalq Yenidənqurma və İnkişaf Bankının, 978,28 milyon dolları (43,8 faiz) isə Beynəlxalq İnkişaf Assosiasiyasının payına düşür. Mənimsənilməmiş vəsaitlərin məbləği 1,371 milyard dollardır.
1,8 milyard dollar vəsaitin ayrılması üçün hazırlıq işləri hələ davam edir.
Hazırda Azərbaycanda DB-nin maliyyələşdirdiyi aktiv layihələr 28, bağlı - 39, ləğv edilmiş - 6, hazırlanma mərhələsində olan layihələrin sayı isə 2-dir.
Azərbaycan 1992-ci ildən DB-nin üzvüdür.
