Azərbaycan, Bakı, 24 sentyabr /Trend, müxbir Təmkin Cəfərov/
"İran və Azərbaycan informasiya texnologiyaları (İT) sahəsində özəl sektorda çalışan şirkətlərin əməkdaşlığını artırmaqda maraqlıdır və Bakıya səfərdə məqsədimiz bu sahədə bazanın yaradılmasıdır". Bunu Trend-ə İranın rabitə və informasiya texnologiyaları nazirinin müavini Müctəba Haşimi deyib.
M.Haşimi bildirib ki, səfər müddətində Azərbaycan şirkətləri ilə müzakirələr aparılacaq: "Çalışacağıq ki, iki ölkənin özəl sektoru arasında gələcək əməkdaşlıq perspektivi barədə razılığa gələk. Çalışırıq ki, müzakirələrdə razılıqlar əldə olunsun və səfərin sonunda poçt, informasiya texnologiyaları (İT) üzrə əməkdaşlığın artırılması üçün iki ölkə arasında əməkdaşlıq müqaviləsi imzalansın".
O, həmçinin əlavə edib ki, müzakirələrin nəticəsi olaraq İran şirkətləri IT sahəsində öz fəaliyyətlərini Azərbaycanda, Azərbaycan şirkətləri isə İranda nümayiş etdirəcəklər.
Qeyd edək ki, İranın rabitə və informasiya texnologiyaları nazirinin müavini Müctəba Haşiminin başçılıq etdiyi nümayəndə heyəti sentyabrın 24-dən 26-dək Bakıda səfərdə olacaq. Səfərdə M.Haşimini İranda rabitə və IT sahəsində çalışan 15 özəl şirkətin nümayəndələri müşayiət edir.
