Azərbaycan, Bakı, 6 aprel /Trend, müxbir Azad Həsənli/
Manatın məzənnəsinin dəyişməsi Azərbaycanda sığorta xidmətlərinin bahalaşmasına səbəb olmadı. Trend-in məlumatına görə, bunu jurnalistlərə Maliyyə Nazirliyi yanında Dövlət Sığorta Nəzarəti Xidmətinin rəhbəri Namiq Xəlilov deyib.
Onun sözlərinə görə, devalvasiya ölkədə fəaliyyət göstərən sığorta şirkətlərinin maliyyə sabitliyinə təsir etmədi: "Öhdəliklər, sığorta ehtiyatları, aktivlər, eləcə də sığorta şirkətlərinin apardığı ödənişlər manatla həyata keçirilir. Buna görə də manatın məzənnəsinin dəyişməsi sığorta şirkətləri üçün risklər yaratmadı".