"Avropa Komissiyası Avropa-Qafqaz-Asiya nəqliyyat dəhlizi (TRACECA) layihəsi çərçivəsində sentyabr-oktyar aylarında həyata keçiriləcək layihələrə 5 milyon avro ayırmışdır". Bu haqda TRACECA Hökumətlərarası Daimi Komissiyasında Azərbaycandan olan milli katib Akif Mustafayev Trend ə müsahibəsində bildirmişdir. Onun sözlərinə görə, həmin maliyyə vəsaiti çərçivəsində 3 treninq layihəsinin həyata keçirilməsi planlaşdırılmışdır.
"2 milyon avro dəyərində olacaq birinci layihə çərçivəsində dəniz nəqliyyatında çalışan rəhbər heyət (gəmi kapitanları və s.) üçün treninqlər keçiriləcəkdir.
Bu layihə çərçivəsində Azərbaycan, Gürcüstan, Ukrayna, Qazaxıstan və Türkmənistan təmsilçiləri iştirak edəcəklər. Eyni maliyyə dəyərinə malik ikinci layihə "Təhlükəli yüklərin daşınmasının tənzimlənməsi qaydaları"nı nəzərdə tutur. Bu layihə çərçivəsində də Azərbaycan, Gürcüstan, Ukrayna, Qazaxıstan və Türkmənistandan olan mütəxəssislərə treninqlər keçiriləcəkdir. 1milyon avro dəyərində olan sonuncu layihə isə "Nəqliyyat operatorlarının (daşıyıcılar) treninqi" layihəsidir. Bu layihə çərçivəsində isə Azərbaycan, Gürcüstan, Ukrayna, Moldova, Qazaxıstan, Özbəkistan, Tacikistan, Türkmənistan və Ermənistan nümayəndələri üçün treninqlər keçiriləcəkdir",- deyə Akif Mustafayev bildirmişdir.
Onun sözlərinə görə, treninqlərin keçirilməsi üçün Avropa Komissiyası tərəfindən hazırda tender elan olunmuşdur. Tenderdə əsasən Qərbi Avropa şirkətləri iştirak edirlər. Qalib şirkət müəyyən edildikdən sonra treninqlərin keçirilməsinə başlanacaqdır.
Milli katib, daha sonra, treninqlərin Bakıda keçirilməsinin mümkünlüyünü də istisna etməmişdir. "Doğrusu Azərbaycan tərəfi indiyədək Avropa Komissiyasına bir neçə investisiya layihəsinin maliyyələşdirilməsi ilə bağlı təklif göndərsə də, indiyədək bunların heç birinə müsbət cavab almamışdır. Digər tərəfdən isə Avropa Komissiyası indiyədək 2005-2006-cı illər üçün büdcəsini təsdiq etməmişdir. Hər halda ümid edirik ki, həmin büdcənin təsdiqi zamanı Azərbaycan tərəfinin təklifləri nəzərə alınacaqdır",- deyə Akif Mustafayev vurğulamışdır.
