Azərbaycanın Nəqliyyat Nazirliyi tərəfindən hazırlanan 2005-2014-cü illərdə avtomobil yolları şəbəkəsinin rekonstruksiyası və inkişafı üzrə dövlət proqramı ilin sonuna kimi təsdiq olunacaq. Bu barədə Trend ə Nəqliyyat Nazirliyindən məlumat verilib.
Hazırda dövlət proqramı baxılmaq üçün ölkənin Nazirlər Kabinetinə təqdim olunub.
"Əvvəllər Nazirlər Kabineti dövlət proqramının layihəsinə müsbət qiymət verib. Sənəd təsdiqləndikdən sonra Prezident Aparatına təqdim olunacaq " - deyə Nazirlikdən bildiriblər.
Layihə çərçivəsində 8 min km-dən artıq avtomobil yolunun tikilməsi nəzərdə tutulub. Bu yolların 1 min km-dən çoxu Azərbaycanı beynəlxalq nəqliyyat marşrutlarla birləşdirən magistral avtomobil yollarıdır. Eləcə də yeni yollar şimaldan cənuba- Bakıdan, Ələtdən keçməklə Rusiya ilə sərhəddən başlayaraq İrana və Gürcüstan istiqamətinə çıxır. Bu yollar 4 zolaqlı birinci kateqoriyalı olmaqla beynəlxalq standartlara cavab verəcək.
Bununla yanaşı, respublika əhəmiyyətinə malik, eləcə də rayonlararası və respublikanın daxilindəki digər yolların rekonstruksiyası və tikintisi həyata keçiriləcək. Dövlət proqramında nəzərdə tutulan işlərə1,5 milyard dollar vəsaitin xərclənməsi nəzərdə tutulub.
