Mayda Azərbaycan hökuməti ilə Dünya Bankı arasında Azərbaycanda kənd təsərrüfatının inkişafı və kreditləşdirilməsi layihəsinin ikinci fazası üzrə kredit razılaşması ilə bağlı rəsmi danışıqlara başlanılacaq. Bu barədə Trend ə hökumətdən məlumat verilib. Aprelin 5-dən DB-nın kənd təsərrüfatı üzrə mütəxəssisi Frauk Yunqblutun başçılıq etdiyi missiya Kənd təsərrüfatı Nazirliyində layihənin hazırlanması üzrə müzakirələrə başlayıb. Eləcə də, layihənin dəyərinin dəqiqləşdiriləcəyi ehtimal edilir. İlkin danışıqlara görə, layihənin ümumi dəyəri $69 mln olub. Bu zaman ölkənin layihədə iştirak payı 14,5 % ($10 mln.) təşkil edir. Hökumət layihənin dəyərinin $45 mln.a qədər azaltmağı təklif edir.
Layihənin birinci fazasından fərqli olaraq kreditin bir hissəsi ($15 mln.) Beynəlxalq Yenidənqurma və İnkişaf Bankının xətti ilə kommersiya şərtləri ilə təqdim edilib. Bu məbləğ orta inkişaf həddində olan aqrar müəssisələrə yardım üçün nəzərdə tutulub. Bu ehtiyatlardan maliyyələşdirmə üçün kommersiya bankları cəlb ediləcək.
