Aprelin 11-də Kənd Təsərrüfatı Nazirliyi yanında Dövlət Baytarlıq Xidmətinin Qubadakı zona laboratoriyasında "quş qripi"nin diaqnostikası və profilaktikası üzrə treninq keçirilib. Bu barədə Trend ə dövlət strukturunun mətbuat xidmətindən məlumat verilib.
ABŞ Beynəlxalq İnkişaf Agentliyinin (USAID) maliyyə dəstəyi ilə keçirilən treninqdə Quba, Dəvəçi, Xaçmaz, Qusar, Siyəzən baytarlıq idarələri və laboratoriyalarının əməkdaşları və mütəxəssisləri iştirak ediblər. Treninqi ABŞ-ın Kolumbiya Universitetinin professoru Ceffri Forman aparıb. Tədbirdə xəstəliyin yaranması tarixi, onun nəticələri, yayılması və insana yoluxması, bioloji təhlükəsizlik qaydaları və xəstəliklə mübarizənin metodları ilə bağlı məsələlərə toxunulub.
Treninq çərçivəsində iştirakçılara "quş qrpi"nə həsr olunan sənədli film nümayiş etdirilib. Bundan əvvəl analoji tədbirlər Lənkəran və Sabirabaddakı zona baytarlıq laboratoriyalarında keçirilib. Növbəti treninqin aprelin 13-də Bərdədə keçirilməsi planlaşdırılıb.
