Azərbaycan Nəqliyyat Nazirliyinin "Yolnəqliyyatservis" Departamenti Ələt - Astara avtomobil magistralının bir hissəsinin yenidən qurulması üzrə əsas tenderdə iştirak edəcək şirkətlərin müəyyən edilməsi ilə bağlı tenderi yekunlaşdırıb. Hazırda trenderin nəticələri bu layihəni maliyyələşdirən Dünya Bankı ilə razılaşdırılır. Proses başa çatdıqdan sonra layihə üzrə podratçı şirkətinin müəyyən edilməsi istiqamətində tenderin elan edilməsi nəzərdə tutulur. Bu barədə Trend ə Nəqliyyat Nazirliyindən məlumat verilib.
2006-cı ildə yolun 22 km-dək olan hissəsinin yenidən qurulmasına başlamaq planlaşdırılır. Bu layihənin ümumi dəyəri $350 mln-dur. Vəsaitin $200 mln məbləğində bir hissəsi Dünya Bankı, $100 mln isə Asiya İnkişaf bankı tərəfindən ayrılacaq. DB-nin vəsaiti ilə yolun Ələtdən Masallıyadək, AİB-in vəsaiti ilə isə Masallıdan Astarayadək olan hissəsi yenidən qurulacaq.
Bu il Nəqliyyat Nazirliyi Muğanlı-Qəbələ avtomobil yolunu yenidən qurmaq niyyətindədir. Bu işlər nazirliyin öz vəsaiti ilə həyata keçiriləcək. Yolun Bakıdan Muğanlıyadək olan hissəsi DB-nin krediti hesabına yenidən qurulacaq. DB artıq Azərbaycanın magistral avtomobil yolları 2 layihəsi çərçivəsində bankın vəsaiti ilə gerçəkləşdiriləcək Bakı-Şamaxı/Muğanlı avtomobil yolunun inşası layihəsinə texniki nəzarəti həyata keçirəcək məsləhətçi şirkətin müəyyən edilməsi üzrə müsabiqə elan edib. Seçilmiş şirkət 120 km uzunluqda olan yolun yenidən qurulması layihəsinin gerçəkləşdirildiyi 18 ay ərzində tikintiyə texniki nəzarət etməlidir.
Şirkət layihənin baş podratçı şirkəti ilə birgə layihəni vaxtında təhvil verməli, onun həyata keçirilmə keyfiyyətini, ətraf mühitin qorunması üzrə kursların keçirilməsini, ödəniş formalarının təsdiqlənməsini, layihənin idarə olunmasını və s. təmin etməlidir.
