Dünya bankının (ÜB) Azərbaycandakı yeni meneceri Qreqori Yeceyçak iyulun birinci həftəsindən ölkədə öhdəliklərinin icrasına başlayır. Bu barədə Trend ə bankın Bakı nümayəndəliyindən xəbər veriblər. O, yaxın günlərdə bankın Cənubi Qafqaz üzrə qabaqcıl iqtisadçısı Kristian Pitersenin başçılığı ilə ÜB missiyasının səfəri çərçivəsində Azərbaycan hökümətinə təqdim olunub. Onun səlahiyyət müddəti üç ilə nəzərdə tutulub.
Nümayəndəlikdən bildiriblər ki, onun ölkə meneceri kimi iş təcrübəsi var. 1998-ci ildən 2003-cü ilə qədər o, bankın Ukraynadakı nümayəndəliyinin başçısı olub. 2003-cü ildən Azərbaycan üzrə menecer təyin olunanadək ÜB-nin Avropa və Mərkəzi Asiya regionunda qabaqcıl iqtisadçısı vəzifəsində işləyib. Qreqori Yeceyçakın 55 yaşı var, evlidir.
Ötən ilin iyul ayından bankın Bakı ofisi başsız qalıb, çünki iyul ayında əvvəlki ölkə meneceri Əhməd Cahaninin dörd illik səlahiyyət müddəti başa çatıb.
