Əmək və Əhalinin Sosial Müdafiə Nazirliyi 2006-cı il iyulun 1-dən əhalinin aztəminatlı təbəqələrindən ünvanlı sosial yardım almaq üçün 25 min ərizə alıb. Trend xəbər verir ki, nazirliyin Yoxsulluq Problemləri və Ünvanlı Sosial Yardım Siyasəti şöbəsinin Ünvanlı Sosial Yardım sektorunun rəisi Vəfa Mütəllimova jurnalistlərə bildirib ki, bu yardımdan faydalana bilən şəxslərin siyahısı hələ dəqiqləşdirilməyib.
O, aztəminatlı ailələrin təminatı ilə bağlı problemlərə toxunub. "Müraciət edənlərin əksəriyyəti bu kateqoriyaya daxil deyil. Problem təqdim olunmuş sənədlərdədir. Onların yoxlanılması nəticəsində aşkar edilib ki, bəziləri öz gəlirlərini gizlədib, bəziləri isə yalandan özlərini 1-ci qrup əlil kimi qələmə verib" - deyə V.Mütəllimova qeyd edib.
Müraciət edənlərin hamısına iş yerləri təklif olunub, lakin onların 80%-i rədd cavabı verib. "İyul ayından etibarən ərizələrinə baxılmış şəxslər müavinətin verilməsini təsdiqləyən sənəd alacaq" - deyə nazirliyin nümayəndəsi qeyd edib.
Ünvanlı sosial yardım 6 ay ərzində veriləcək. Bu müddət başa çatdıqdan sonra həmin şəxslər yenidən nazirliyə müavinət üçün müraciət edə bilər.
