"Siyasi partiyalar haqqında" qanuna əlavə və dəyişikliklərlə bağlı Milli Məclisə təqdim etdiyimiz layihəyə hələ də cavab verilməyib. Bu barədə Trend ə Böyük Quruluş Partiyasının sədri, millət vəkili Fazil Qəzənfəroğlu bildirib.
F.Qəzənfəroğlu parlamentə təqdim etdiyi sənəddə partiyaların maliyyələşməsi məsələsinə də geniş yer verildiyini bildirib. Millət vəkili qeyd edib ki, hazırladıqları sənəddə partiyaların dövlət büdcəsindən maliyyələşməsi göstərilib: "Biz düşünürük ki, parlamentdə təmsil olan və seçkilərdə 50 mindən artıq səs toplayan partiyalar dövlət tərəfindən maliyyələşə bilərlər". Millət vəkili onu da bildirib ki, onların hazırladığı sənəd mövcud reallıqlarla uyğunlaşdırılıb. F.Qəzənfəroğlu vurğulayıb ki, 2010-cu ildə isə yalnız parlamentdə təmsil olan partiyaların maliyyələşməsinin tərəfdarıdırlar.
Qeyd edək ki, 1992-ci ildə parlamentə qəbul edilən "Siyasi partiyalar haqqında" qanuna əlavə və dəyişikliklər edilməklə yaz sessiyasında müzakirəsi planlaşdırılmışdı. Lakin sənəd müzakirəyə hələ hazır olmadığından Milli Məclisin payız sessiyasında gündəliyə çıxarılacaq. Sənədlə bağlı parlament rəhbərliyi millət vəkillərinə rəy və təkliflərini vermələrini tapşırmışdı.