Beynəlxalq Maliyyə Korporasiyası Azərbaycan Milli Bankına kredit bürosu institutu yaratmağı təklif edib. Bu barədə Trend ə AMB-nin baş direktoru Rüfət Aslanlı xəbər verib. O, qanunvericilik bazasının imkan verdiyi alternativ və ya paralel büronun yaradılması ehtimalını istisna etmir.
"Banklar haqqında" qanunda kredit bürosunun yaradılmasına imkan verən bənd var. Orada göstərilib ki, banklar özləri bu büronu yarada bilər.
"Bu zaman müəyyən tələblər var. Belə ki, büroda bankın sirri olan informasiya toplanır. Lakin sektor özü belə institutları yarada bilmədiyindən, Milli Bank Azərbaycan Banklar Assosiasiyasının xahişi ilə bu təşəbbüsü öz üzərinə götürüb", - deyə R.Aslanlı qeyd edib.
AMB-də kredit reyestrinin yaradılmasına qədər özəl kredit bürosunun yaradılması üçün iki dəfə təşəbbüs edilib. Birinci dəfə təşəbbüs Azərbaycan Banklar Assosiasiyasından gəlib. Bunun üçün TACİC proqramı maliyyə və texniki yardım göstərməyə hazır idi. Sektor bunu təhdid kimi qiymətləndirərək, bu işə razı olmadı. Onlar düşünürdülər ki, informasiya açıla bilər.
AMB-də kredit reyestri ilyarım bundan əvvəl yaradılıb və kifayət qədər səmərəli şəkildə fəaliyyət göstərir. O, DB-nin "Azərbaycanın maliyyə sektorunun inkişafına texniki yardım" layihəsi çərçivəsində yaradılıb.