Türkiyə Azərbaycan hökumətindən Türkiyə nəqliyyatı vasitəsilə Azərbaycan ərazisilə daşınan tranzit yüklərinin gömrük məsələlərini nizamlamağı xahiş edib. Türkiyə dövlət naziri Mehmet Aydının Trend ə verdiyi məlumata əsasən, bu gün yüklərin tranzitinə görə orta hesabla $600 ödəmək lazım gəlir.
Azərbaycan-Türkiyə hökumətlərarası komissiyası çərçivəsində iyulun 27-də keçirilən görüşdə Türkiyə tərəfinin bu tariflərin azaldılması haqqında təklifi nəzərdən keçirilib. "Bu məsələnin həlli üçün Azərbaycanla Türkiyə arasında siyasi razılıq var. Biz bu məsələdə boşluqların tezliklə aradan qaldırılmasını istəyirik. Gömrük orqanları gələcəkdə yüklərin daşınması şərtləri ilə bağlı danışıqlar aparacaq" - deyə M.Aydın vurğulayıb.
Dövlət nazirinin Azərbaycanda işləyən Türkiyənin iş adamları ilə görüşündə gömrük sahəsilə bağlı narahatlıq ifadə olunub. Azərbaycan sərhədində təhlükəli yüklərin rəsmiləşdirilməsi və yoxlanmasını asanlaşdırmaq təklif olunub. Məsələn, Avropada müvafiq yoxlamadan keçmiş təhlükəli yüklər Azərbaycan gömrüyündə təkrar yoxlanılmasın. Həmçinin yüklərin təhlükəlik dərəcəsinə görə fərqləndirilməsinə ehtiyac var.
