Beynəlxalq Valyuta Fondu (BVF) ölkədə monetar siyasətin təkmilləşdirilməsi üçün Azərbaycan Milli Bankına texniki yardım göstərməyə başlayır. Bu barədə Trend ə BVF-nın Bakı nümayəndəliyindən xəbər veriblər.
BVF-nın Monetar və Maliyyə Sistemləri Departamentinin texniki missiyası avqustun 7-də Bakıya gəlir. Missiyaya departamentin baş iqtisadçısı Cefri Hinan rəhbərlik edir, missiyanın tərkibinə həmçinin iqtisadçılar Rama Set və Anna Nordstrom daxil olacaq.
Fondun nümayəndəliyindən verilən məlumata əsasən, Milli Bank BVF-dan bu yaxınlarda texniki yardım göstərilməsini istəyib. Fondun ekspertləri Milli Bank, Maliyyə Nazirliyi, Dövlət Neft Fondu, Bakı Fond Birjası və Bakı Banklararası Valyuta Birjasında görüşlər keçirəcək.
Səfər avqustun 17-nə qədər davam edəcək.
