Carana Corporation və SAR nümayəndələri Azərbaycanın Hesablama Palatasının mütəxəssisləri ilə görüşüb
Azərbaycanın xəzinə sisteminin avtomatlaşdırılması ilə məşğul olan Carana Corporation və SAR nümayəndələri Azərbaycanın Hesablama Palatasının (AHP) mütəxəssisləri ilə görüşüb. AHP-dən Trend ə verilən xəbərə görə, görüş zamanı palatanın və ölkənin Maliyyə Nazirliyinin Dövlət xəzinəsinin analitik - informasiya sistemlərinin birləşdirilməsi perspektivləri müzakirə edilib. AHP nümayəndələri şirkət nümayəndələrinin 20-dən çox sualına cavab verib.
Carana Corporation və SAR mütəxəssisləri həmçinin palatanın fəaliyyəti, onun əsas funksiyaları ilə yaxından tanış olublar.
Qeyd edək ki, ötən həftə adları çəkilən şirkətlərin mütəxəssislərinin AHP başçısı Namiq Nəsrullayev ilə bununla əlaqədar görüşü olub. Görüşdə palatanın və Dövlət xəzinəsinin analitik-informasiya sistemlərinin birləşməsinin mümkün olmadığı qeyd olunub. Bunun səbəbi kimi palatanın indiyədək analitik-informasiya sisteminin olmaması göstərilib.
AHP-də həmçinin qeyd ediblər ki, onlar bu məsələ üzrə Azərbaycanın Dövlət xəzinəsinin avtomatlaşdırılması üçün kredit vəsaitləri ayıran Dünya bankına dəfələrlə təklif göndəriblər.
