Vergilər Nazirliyi operativ vergi nəzarəti üzrə genişmiqyaslı tədbirlər çərçivəsində 45 633 obyektdə vergi reydləri keçirib.
Trend in Vergilər Nazirliyinin Operativ nəzarət idarəsinin press-relizinə istinadən verdiyi xəbərə görə, avqustun 16-na olan vəziyyətə görə, 12548 obyektdə qanunvericiliyin pozulması faktı aşkar edilib. Nəticədə bu obyektlərə 1153,636 min manat məbləğində inzibati cərimə kəsilib.
Vergi reydləri iyulun 24- dən Bakı üzrə keçirilməyə başlamış, lakin bu ay reydlər Sumqayıt və Abşeron üzrə keçirilir və gələcəkdə ölkənin digər bölgələrini də əhatə edəcək. Vergi reydləri nəzarət-kassa aparatlarından istifadə edilməsi və vurulmuş kassa çeklərinin alıcılara təqdim edilməsi, yəni əhali ilə nağd pul hesablaşmalarının aparılması qaydalarına riayət olunmasına nəzarət məqsədilə həyata keçirilir.
