Azərbaycanın Xarici İşlər Nazirliyi Azərbaycan-İran hökumətlərarası iqtisadi əməkdaşlıq komissiyasının 7-ci iclasının 2006-cı ilin sonunadək keçirilməsi istiqamətində hazırlığa başlayıb.
Komissiyanın Azərbaycan tərəfdən həmsədri, XİN başçısı Elmar Məmmədyarovun Trend ə verdiyi məlumata görə, artıq iclasın gündəliyinin hazırlanması məqsədilə rəylərin toplanması üçün artıq ölkənin müvafiq nazirlik və idarələrinə bildiriş göndərilib.
"İclası iclas xatirinə keçirmək lazım deyil. Buna görə də biz əvvəlcə digər nazirlik və idarələrlə çox ciddi iş aparmalı və gündəliyi müəyyən etməli, məsələlərin üzərində işləmək üçün hazırda hansı vəziyyətin hökm sürdüyünə nəzər salmalıyıq. Ölkələrimiz qonşu olduğundan, gündəlik də böyük olacaq. Bundan başqa müzakirədə olan məsələlər də var. Ancaq digər nazirlik və idarələrlə məsləhətləşmədən konkret danışmaq çox çətindir", - deyə nazir qeyd edib.
1993-2005-ci illərdə İranın iş adamları Azərbaycan iqtisadiyyatına $356 mln sərmayə qoyub. İran Azərbaycanda sement istehsalının təşkili, kənd təsərrfüfatı texnikasının (kombayan və traktorlar) istehsalı, elektrik stansiyaları, metallurgiya üçün turbin istehsalı sahələrini əməkdaşlığın prioritet istiqamətləri hesab edir. Bu məqsədlə iranlı nazir müştərək İnvestisiya Fondu yaratmağı təklif edib.
İyunda İranın sənaye və mədən naziri Əlirza Təhmasebinin Azərbaycana səfəri zamanı İran tərəfi Azərbaycan-İran İnvestisiya Fondunun yaradılması ilə bağlı ideya irəli sürüb. Hökumətlərarası komissiyanın iclasında bu məsələyə də baxılması planlaşdırılır.