Azərbaycan Respublikası Gənclər və İdman Nazirliyi sahibkarlıq fəaliyyəti ilə məşğul olmaq istəyən ordudan tərxis olunmuş gənclər uçun sahibkarlığın əsaslarına dair seminarların keçirilməsinə başlayıb. Trend xəbər verir ki, seminarlar "Azərbaycan Respublikasında kiçik və orta sahibkarlığın inkişafı Dövlət Proqramı"na, ölkəmizdə sahibkarlığın inkişafına dair həyata keçirilən proqramlara və "Azərbaycan Gəncliyi Dövlət Proqramının (2005-2009-cu illər)" 4.5 bəndinə uyğun olaraq keçirilir.
Seminarların keçirilməsində məqsəd - Azərbaycanın iqtisadi potensialının gucləndirilməsində gənclərin rolunu artırmaq, ordudan tərxis olunmuş gənclərin sosial-iqtisadi inkişaf layihələrində iştirakını təmin etmək, gəncləri sahibkarlıq fəaliyyətinə həvəsləndirmək, həmçinin ordudan tərxis olunmuş gənclər arasında işsizliyin azaldılması və onların yeni peşələrə yiyələnməsi uçun sahibkarlıq fəaliyyətinin təşkili sahəsində metodiki köməyin göstərilməsidir.
