Azərsu SC Oğuz-Qəbələ-Bakı su kəmərinin tikinti layihəsi çərçivəsində konsaltinq xidmətləri üçün tender elan edib. Trend xəbər verir ki, tenderin mövzusu layihənin idarə olunması və texniki nəzarəti üzrə konsaltinq xidmətlərinin göstərilməsidir. Tenderlə maraqlananlar oktyabrın 9-a qədər öz təkliflərini təqdim etməlidirlər.
Hazırda layihənin texniki-iqtisadi əsaslandırılmasının hazırlanması üzrə işlər başa çatdırılır. Uzunluğu 264 km və diametri 2 m olan su kəməri ilə saniyədə 3 kubmetr su öz axarı ilə Bakıya çatacaq.
Bu zonada yeraltı suların istismar ehtiyatı 15m3/saniyəni ötür.
Su kəmərinin marşrutu Oğuz-Qəbələ ərazisindəki su anbarından çəkiləcək və Çarxana-Göyçay-Ağsu-Udullu ərazisindən keçəcək. Su kəməri üzrə tikinti işlərinin ilin sonunadək başlanması və 2008-ci ildə istismara verilməsi planlaşdırılır.
