Fransanın "BNP Paribas" bankı Hacıqabuldan Gürcüstan sərhədinədək avtomobil magistralının iki zolaqlıdan dörd zolaqlıya genişləndirilməsi layihəsi üzrə kredit sazişini baxılmaq üçün Azərbaycan hökumətinə təqdim edib.
Azərbaycan Nəqliyyat Nazirliyindən Trend ə verilən məlumata görə, bank $300 mln. məbləğində vəsait ayrımağa hazır olduğunu bildirir. Bu vəsait yolun 184,8 km-lik Hacıqabuldan Yevlaxadək və 38 km-lik Qazaxdan Gürcüstan sərhədinədək olan hissəsinin maliyyələşdirilməsinə yönəldiləcək.
Kredit sazişi layihəsinə əsasən, "BNP Paribas" krediti 3 ili güzəştli olmaqla libor+0,5 faiz dərəcəsi ilə 13 illiyə vermək niyyətindədir.
Nəqliyyat Nazirliyi TACİS proqramının texniki yardımı çərçivəsində hazırlanmış texniki sənədlər əsasında texniki-iqtisadi əsaslandırmanı tamamlayıb. Magistralın lap əvvəlindən Hacıqabuladək dörd zolaqlı yol çəkilib, ona görə də qalan hissəni bu yola uyğunlaşdırmaq planlaşdırılır.
Hacıqabuldan Gürcüstan sərhədinədək 400 km-lik birinci dərəcəli yolun tikintisi üçün hazırda Dünya Bankının, Slovakiyanın İcrac Bankının təkliflərinə də baxılır.