"Agrolizing" ASC avtomobillərin alınması üzrə tender elan edib. Trend in xəbər verdiyi kimi, tender bir lot üzrə - özü boşaldan avtomobillərin (4 ədəd), avtokarların (2 ədəd), səyyar texniki-təmir avtomobillərinin (3 ədəd), yük və sərnişin daşınması avtomobillərinin (6 ədəd), avtodartıcıların (2 ədəd), daymanların (2 ədəd), yanacaq daşınması və doldurulması üzrə avtomobillərin (8 ədəd) alınması üzrə aparılır.
Tenderdə iştirak etmək istəyənlər 400 manat ödəməli, oktyabrın 19-dək təkliflərini ASC-yə təqdim etməlidirlər. Tender zərfləri okyabrın 20-də Kənd Təsərrüfatı Nazirliyində açılacaq.
Bundan başqa, 2006-cı ilin sonunadək dövlət müəssisəsi 250 kombayn, 464 traktor və 1143 ədəd müxtəlif kənd təsərrüfatı texnikasını almaq niyyətindədir.
Dövlət müəssisəsinə ayrılmış büdcə vəsaiti hesabına 2005-ci ildə 250 kombayn, 330 traktor və 636 müxtəlif texnika alınıb.
"Agrolizing" ASC Azərbaycan prezidenti İlham Əliyevin sərəncamı ilə 2004-cü il oktyabrın 23-də yaradılıb. Müəssisənin fəaliyyəti müxtəlif kənd təsərrüfatı texnikasını alaraq yerli torpaq sahiblərinə lizinq yolu ilə verməklə aqrar sahənin yaxşılaşdırılmasına və ölkədə sahibkarlığın dəstəklənməsinə yönəlib. Hazırda Azərbaycanın müxtəlif bölgələrində ASC-nin 47 aqrotexservis və filialları fəaliyyət göstərir.
