Azərbaycanın Vergilər Nazirliyində Litvanın Baş prokurorluğu və Xüsusi araşdırmalar idarəsinin ekspertləri ilə görüş keçirilib. Vergilər Nazirliyindən Trend ə verilən xəbərə görə, görüşün əsas məqsədi Azərbaycanda korrupsiya ilə mübarizə istiqamətində vergi orqanlarının fəaliyyəti ilə tanış olmaqdan ibarət olub.
Litvalı qonaqlarla nazirlik aparatının başçısı Asif Cahangirov, Baş daxili audit idarəsinin başçısı Vüqar Əliyev, Daxili təhlükəsizlik idarəsinin başçısı Fəxrəddin Qəmbərov, Vergi cinayətlərinin ilkin araşdırılıma departamentinin başçısı Nurəli Məmmədov və Beynəlxalq münasibətlər idarəsinin başçısı İlqar Ələkbərli görüşüb.
Görüşdə Baş prokurorluqda korrupsiya faktı üzrə cinayətlərin araşdırılması idarəsindən baş prokuror Alqimantas Kliunka nazirlik rəhbərliyi ilə görüşmək istədiyini bildirib.
Qonaq korrupsiya ilə mübarizə sahəsində aparılan islahatlar, prokurorluq orqanlarının fəaliyyəti, Litvanın hüquq-mühafizə orqanlarının strukturu haqqında məlumat verib.
Vergilər Nazirliyinin rəsmi şəxsləri Litva təcrübəsi ilə tanış olaraq, Azərbaycanda bu sahədə aparılan islahatlar haqqında danışıb.
Litvalı qonaqlar vergi cinayətləri və əməliyyat-axtarış tədbirləri sahəsində ilkin araşdırmaların aparılması üzrə vergi orqanlarına səlahiyyətlərin verilməsi haqqında məlumatla maraqlanıblar. Müzakirələrin başlıca mövzusu daxili audit və daxili təhlükəsizlik strukturlarının, həmin strukturların daxili sistem fəaliyyətinin yaradılması, korrupsiya ilə mübarizə sahəsində görülən tədbirlər üzrə məsələlər olub.
Görüşdə həmçinin müzakirə mövzusu yüksək vəzifəli şəxslərin maliyyə vəsaitləri haqqında bəyannamələrin verilməsi üzrə Litva təcrübəsi ilə tanış olmaq olub. Azərbaycan üçün bu ona görə maraqlı idi ki, ölkədə həmin sistem yalnız indi yaradılır. Bundan başqa, AB üzvü kimi Litvanın təcrübəsi maraqlıdır.
