Oktyabrın 4-də Milli Məclisin insan hüquqları, hüquq siyasəti və dövlət quruculuğu məsələləri daimi komissiyalarının birgə iclası keçirilib. Trend xəbər verir ki, öncə insan hüquqları daimi komissiyasının sədri Rəbiyyət Aslanova "Gender (kişi və qadın) bərabərliyinin təminatları haqqında" qanun layihəsi barədə məlumat verib.
O deyib ki, layihənin parlamentin yaz sessiyasında ikinci oxunuşda müzakirəsi zamanı səslənmiş irad və təkliflərin bir çoxu işçi qrupu tərəfindən nəzərə alınıb. Qanunun məzmununda, ayrı-ayrı maddələrində mühüm dəyişikliklər edilmiş, bəzi müddəalar çıxarılmış, bir maddəyə əlavə bənd salınıb. Qanun layihəsi əsaslı surətdə təkmilləşdirilib və üçüncü oxunuşun tələblərinə cavab verir.
Sonra hüquq siyasəti və dövlət quruculuğu məsələləri daimi komissiyasının sədri Əli Hüseynov "Azərbaycan Respublikasının bəzi qanunvericilik aktlarına əlavələr və dəyişikliklər edilməsi haqqında", "İnformasiya əldə etmək haqqında" Qanunun tətbiqi ilə əlaqədar bəzi qanunvericilik aktlarına əlavələrin və dəyişikliklərin edilməsi barədə" və "Dövlət sirri haqqında" Qanunun tətbiqi ilə əlaqədar bəzi qanunvericilik aktlarına əlavələrin və dəyişikliklərin edilməsi barədə" qanun layihələrini müzakirəyə təqdim edib.
O bildirib ki, Azərbaycan prezidentinin qanunvericilik təşəbbüsü ilə parlamentə göndərdiyi qanunlar paketində "Hərbi qulluqçuların statusu haqqında", "Müdafiə haqqında", "Ölkədən getmək, ölkəyə gəlmək və pasportlar haqqında" qanunlara və Ailə Məcəlləsinə əlavələrin və dəyişikliklərin edilməsi nəzərdə tutulur. Bu dəyişikliklər qanunların daha da təkmilləşməsinə xidmət edir.
Qanun layihələri təsdiqlənmək üçün Milli Məclisin müzakirəsinə tövsiyə olunub.