Texnikabank ikinci kredit xəttini almaq üçün Qara dəniz ticarət və inkişaf bankı (QTİB) ilə danışıqlara başlayıb. Texnikabankın idarə heyətinin sədri Samir Hüseynovun Trend ə verdiyi xəbərə görə, kredit xətti ipotekanın maliyyələşdirilməsi üçün nəzərdə tutulacaq.
O ehtimal edir ki, QTİB krediti 2007-ci ilin əvvəlində verə bilər və hazırda qiymətləndirilmə aparılır, belə ki, ipoteka kreditləşməsi üçün mexanizm olmalıdır. Bununla yanaşı, S.Hüseynov istisna etmir ki, bu, Azərbaycan ipoteka fondunun (AİF) vəsaitləri hesabına maliyyələşdirmə mexanizmi ilə eyni və ya bir qədər sadə ola bilər.
Texnikabank AİF-in fəal tərəfdaşıdır və hazırda fondun vəsaitləri hesabına 783 min manat məbləğində 32 ipoteka krediti verib.
Bu, Texnikabankın QTİB-dən aldığı ikinci kredit xətti olacaq. 2 mln. ABŞ dolları məbləğində, libor+2,5% faiz dərəcəsi ilə bir il müddətinə verilmiş ilk xətt Qara dəniz bankı ilə 12 iyun 2006-cı ildə imzalanmış kredit sazişi əsasında alınıb.
S.Hüseynovun sözlərinə görə, bu kredit xətti tamamilə mənimsənilib və həmin vəsaitlər hesabına istehsalat, qida sektoru, avadanlıqların alınması və s. sahələrdə 27 layihə maliyyələşdirilib. Hər layihəyə 20-50 min ABŞ dolları vəsait ayrılıb.
