Trend xəbər verir ki, Azərbaycan Nəqliyyat Nazirliyinin "Yolnəqliyyatservis" Departamenti Dünya Bankının (DB) krediti çərçivəsində İkinci Magistral Avtomobil Yolu Layihəsi üzrə konsaltinq xidmətini göstərəcək podradçı şirkətin seçimi üzrə tender elan edib.
Məsləhətçi ümumi uzunluğu 800 km olan Azərbaycan avtomobil yolları layihələri üzrə müfəssəl injinirinqin, ilkin layihələrin hazırlanması, ətraf mühitə təsirin qiymətləndirilməsi, spesifikasiyaların, smeta və tender sənədlərinin hazırlanması üçün cəlb olunur. Bu layihələr sırasında R6 Tağıyev -Sahil avtomobil yolu, M4 Bakı - Şamaxı - Yevlax avtomobil yolunun Muğanlı-Yevlax hissəsi, M6 Hacıqabul - Bəhrəmtəpə - Mincivan - Ermənistanla sərhədədək avtomobil yolunun Hacıqabul - Bəhrəmtəpə -Horadiz hissəsi, R18 Mingəçevir -Stansiya Mingəçevir-Bəhrəmtəpə - Horadiz, M8 Naxçıvan - Ordubad- Zərəni stansiyası - Ermənistanla sərhədədək, M5 Yevlax- Zaqatala- Gürcüstanla sərhədədək, M7 Naxçıvan-Sədərək - Türkiyə ilə sərhədədək üzrə layihələr yer alıb.
Tenderdə iştirak etmək istəyən şirkətlərin təklifləri oktyabrın 25-dən gec olmayaraq təqdim olunmalıdır.
