Avropa Birliyinin TACIS proqramı ilə əməkdaşlıqda Azərbaycanda İxracın və İnvestisiyaların Təşviqi Fondu (AZPROMO) tərəfindən təşkil olunmuş "Xarici investisiyaların cəlb olunması üçün sənaye zonalarının yaradılması" mövzusunda "dəyirmi masa" noyabrın 20-də keçiriləcək. Trend AZPROMO-nun məlumatına istinadən xəbər verir ki, bununla yanaşı noyabrın 26-da Azərbaycanın investisiya qanunvericiliyinə dair müzakirələr planlaşdırılır. Dəyirmi masalar İqtisadi İnkişaf Nazirliyinin dəstəyi ilə, TACIS-in AZPROMO-ya dəstək layihəsi çərçivəsində həyata keçiriləcək.
Müzakirələrdə iş adamlarının, rəsmi şəxslərin və Avropa ekspertlərinin iştirakı gözlənilir. Müzakirələrin nəticəsində AZPROMO-nun hökümətin investisiya siyasətinin dəstəklənməsinə yönəlmiş fəaliyyətinə dair tövsiyyələr hazırlanacaq.
"Hesab edirəm ki, müzakirələr ölkəyə investisiya axınının daha da genişlənməsi üçün öz töhvəsini verə bilər", - deyə AZPROMO Müşahidəçilər Şurasının sədri, millət vəkili Çingiz Əsədullayev bildirib.
"Tədbirlərin məqsədi Avropa ekspertlərilə təcrübə mübadiləsi, investisiya mühitinə dair yerli biznes-icmanın fikirlərini öyrənməkdən ibarətdir", - deyə AZPROMO-nun prezidenti cənab Emil Məcidov bildirib. AZPROMO-nun prezidenti Fondun AB TACIS proqramı ilə əməkdaşlığını müsbət qiymətləndirib.
"Bu müzakirələr sonuncu deyil - Fonda dəstək layihəsi çərçivəsində həmçinin ixracın inkişafı, azad iqtisadi zonaların yaradılması mövzularında "dəyirmi masaların", konfransın keçirilməsi nəzərdə tutulur", - deyə AB TACIS layihəsinin icrası üzrə qrupun rəhbəri cənab Jan-Klod Ravo (Jean-Claude Raveau) bildirib. O qeyd edib ki, 2 avqust 2005-ci il tarixindən icrasına başlanmış layihə çərçivəsində artıq bir sıra tədbirlər uğurla həyata keçirilib. "Tədbirlər sırasına Bakıda və bölgələrdə iş adamları üçün təşkil olunmuş treninqləri, çoxsaylı dəyirmi masaları, konfransları və AZPROMO-ya dəstəyin başqa formalarını aid etmək olar", - deyə cənab Ravo bildirib.