2007-ci ildən etibarən bütün Azərbaycan bankları MasterCard beynəlxalq ödəniş sisteminin çip kartlarına keçid prosesinə başlayır. Bu barədə Trend ə sistemin baş direktoru Elmar Sadıxov məlumat verib. Bankların prosessinq sertifikatlaşdırılmasının başlanması ilə əlaqədar bu yaxınlarda MasterCard-ın ekspert qrupu Bakıda idi. Bu proses təxminən gələn ilin əvvəlində başa çatacaq və bütün banklar eyni vaxtda bu prosesdən keçəcəklər.
Digər ödəniş sistemi Visa İnternational -da çip sertifikasiyası prosesi hələ ötən il başlayıb. E.Sadıxovun sözlərinə görə, hazırda demək olar ki, bütün banklar çip texnologiyasına keçiblər. Bu günə qədər buraxılan 1,5 mln. kartın 50 mini Azərbaycan Beynəlxalq Bankı, Kapitalbank, Əmrahbank, "Respublika" bankı tərəfindən buraxılan çip kartların payına düşür.
Beynəlxalq ödəniş sistemlərinin yeni üzv-bankları dərhal çip sertifikasiyasından keçir.
Çip texnologiyasına keçid - bütün bankların maliyyə öhdəliyi olduğundan, tezliklə iki ödəniş sisteminin bütün üzv-bankları çip kartlara keçəcək.
Visa-da çip kartlarının sertifikatlaşdırılması prosesi pulsuz keçirilir, MasterCard- da isə bu proses hər banka 30-40 min ABŞ dollarına başa gəlir. Çip kartların qiymətinə gəlincə, Visa tədarükçü tərəfindən qiymətin aşağı salınmasına yardım edir. Əgər 2 il bundan əvvəl çip kartı 9-10 ABŞ dolları idisə, bu gün onun qiyməti 2 ABŞ dollarına qədər aşağı düşüb.
