2007-10-cu illər üçün nəzərdə tutulmuş Azərbaycan höküməti ilə tərəfdaşlığın yeni strategiyası çərçivəsində Dünya bankı Beynəlxalq inkişaf assosiasiyasının xətti üzrə güzəştli şərtlərlə ölkənin maliyyələşdirilməsini dayandırmaq niyyətindədir. Bu barədə bugünkü konfransda Dünya bankının Cənubi Qafqaz üzrə aparıcı iqtisadçısı Kristian Pitersen məlumat verib. Bu barədə Trend xəbər verir.
Onun sözlərinə görə, Azərbaycanın gəlirinin artması ilə ölkə güzəştli kredit alan ölkələr kateqoriyasından tədricən çıxarılacaq. Adambaşına düşən ÜDM həcminin 1280 ABŞ dollarından çox olduğu ölkələr bu meyara aid edilir.
Azərbaycan artıq DB-nin BİA-nın kreditlərini almaq üçün başlıca meyar qismində müəyyən etdiyi gəlir səviyyəsini ötüb. "Bununla əlaqədar güzəştli kreditlərin daha yoxsul ölkələrə, o cümlədən Afrika ölkələrinə yönəldilməsi daha məqsədəuyğundur", - deyə K.Pitersen qeyd edib.
O, Azərbaycana güzəştli kreditlərin verilməsinin dayandırılacağı vaxtı deməyə çətinlik çəkib və qeyd edib ki, bu, ölkənin iqtisadi inkişaf səviyyəsindən asılı olacaq. Bu, tədricən baş verəcək. Əvvəlcə kredit məhdud həcmdə veriləcək, sonra isə tamamilə dayandırılacaq. 30 iyun 2007-ci il tarixində başa çatan bankın 2007-ci maliyyə ili üçün Azərbaycanın BİA-nın kreditlərini almaq üçün limit təxminən 80 mln. ABŞ dolları təşkil edir, 2008-ci il üçün isə - 50 mln. ABŞ dollarının ayrılacağı gözlənilir.
BİA vəsaitləri əsasən texniki yardımın xüsusi çəkisinin yüksək olduğu dövlət administrasiyası sisteminin təkmilləşdirilməsi üçün, eləcə də biliklərin yüksəldilməsini tələb edən layihələr və sosial sektordakı layihələr üçün ayrılacaq.