Azərbaycan Milli Bankı bu gün açıqlanmış 2007-ci il üçün pul siyasətinin əsas istiqamətlərində 11 ayın yekununa görə ölkənin strateji valyuta ehtiyatlarının 1,7 dəfə artdığını qeyd edib. Trend AMB-nin bəyanatına istinadən xəbər verir ki, onlar 4 mlrd. ABŞ dollarına çatıb və bu, ölkənin ödəniş balansında cari hesabın böyük profisitini təmin edib.
2006-cı ilin 9 ayı ərzində cari balansın profisiti 2 mlrd. ABŞ dolları təşkil edib. Müsbət saldonun formalaşmasında başlıca rolu neft ixracı oynayıb və neft-qaz ixracının iki dəfə artması nəticəsində ticarət balansında 5,4 mlrd. ABŞ dolları həcmində müsbət saldo yaranıb. Neft ixracının sürətli artımı ABƏŞ tərəfindən neft sektoruna cəlb olunmuş birbaşa investisiyaların qaytarılmağa başlaması ilə izah olunur. Bu öhdəliklərin yerinə yetirilməsinin bir-iki il ərzində başa çatacağı ehtimal olunur.
Kapital hesab üzrə ölkənin kreditor kimi mövqeyinin xeyli güclənməsi müşahidə olunur. İlin əvvəlindən ölkənin bütün kapital axınlar üzrə aktivlərinin 2,5 mlrd. ABŞ dolları həcmində artdığı halda, öhdəliklər cəmi 0,7 mlrd. ABŞ dolları artıb.
