Azərbaycanın kiçik şəhərlərində su təchizatı və kanalizasiya sisteminin yaxşılaşdırılması layihəsi çərçivəsində Azərbaycan hökuməti və Dünya Bankı arasında rəsmi danışıqlar ilkin olaraq mart ayına planlaşdırılıb. Bu barədə Trend ə Nazirlər Kabinetindən məlumat verilib.
Yekun müddət DB-nin şərtinin yerinə yetirilməsi - ilk su layihəsi "Böyük Bakının su təchizatı" layihəsi auditinin tamamlanmasından sonra müəyyənləşdiriləcək.
Tərəflər layihəyə 20 rayonun daxil edilməsi barədə qərara gəlib. Lakin artıq 10 rayon üzrə texniki-iqtisadi əsaslandırmaya başlanıb. Bu ryaonlara Ağdam, Biləsuvar, Goranboy, Quba, Xaçmaz, Zaqatala və başqa rayonlar daxildir. Bu 20 şəhərin su şəbəkəsi və kanalizasiya sistemlərinin bərpa olunması üçün Dünya Bankı 240 milyon dollar ayıracaq. Birinci mərhələdə 10 şəhərə 120 milyon dollar ayrılacaq. DB-nin Azərbaycan hökuməti ilə əməkdaşlıq strategiyasına əsasən (2007-2010-cu illər), kreditin təsdiqi 2007-ci maliyyə ilində nəzərdə tutulub. 2009-2010-cu illərdə su təchizatı və kanalizasiya milli sistemlərinin inkişafına əlavə 200 milyon dollar təqdim olunacaq.
