Azərbaycan,Bakı/müxbir Trend Ü.İsmayılova/Azərbaycanın sığorta şirkətlərində müasir korporativ menecmentliyin inkişafı xarici investorların fəallaşmasına təkan verəcək. Bu barədə MBASK sığorta şirkətinin baş direktoru Cəmil Məlikov bildirib.
"İnvestorlar yerli sığorta bazarında etibar qazanmış şirkətlərə kapital qoymağa üstünlük verir. Bunun üçün isə şirkət korporativ menecmentliyi inkişaf etdirməlidir", - deyə o bildirib.
C.Məlikovun sözlərinə görə, bu yaxınlarda qəbul olunması gözlənilən "Sığorta haqqında" yeni qanun layihəsində korporativ menecmentliyin inkişafına xüsusi diqqət ayrılıb. Belə ki, şirkətdə inkişaf etmiş idarəetmə əsasən nizamnamə kapitalının artırılması üçün şərait yaradacaq.
Azərbaycan Maliyyə Nazirliyinin dövlət sığorta nəzarəti şöbəsinin rəhbəri Namiq Xəlilovun sözlərinə görə, hazırda "Sığorta haqqında" qanun layihəsi hüquqi ekpertizaya təqdim olunub və onun qəbulu aprelin sonunda gözlənilir.
