Azərbaycan, Gəncə / Trend müxbir V.Məmmədov/ Azərbaycanın Gəncə şəhərində 12 saylı Ərazi Vergilər İdarəsinin yeni binasının açılış mərasimi keçirilib. Tədbirdə bildirilib ki, idarədə ümumilikdə yeddi şöbə fəaliyyət göstərir və yeni binada onların ixtiyarına 40 otaq verilib. Bütün şöbələr müasir avadanlıq və digər inventarlarla təchiz edilib.
Yeni binada, həmçinin 200 nəfərlik iştirakçı tutumuna malik iclis zalı, istilik sistemi, iki idman zalı, yeməkxana da istifadəyə verilib. Binanın həyətində bir hektara yaxın yeni yaşıllıq zonası salınıb. Tədbirdə vergilər nazirinin müavini Natiq Qasımov və Gəncə şəhər İcra Hakimiyyətinin başçısı Eldar Əzizov iştirak edib.
12 saylı Ərazi Vergilər İdarəsinin yeni binasının açılışı hələ ötən ildən planlaşdırılsa da, təmir işləri yubanıb. Əvvəllər Mədəniyyət Evi kimi fəaliyyət göstərən sözügedən binanın təmirinə vəsaiti Vergilər Nazirliyi ayırıb.
Azərbaycanın Gəncə şəhəri paytaxt Bakıdan 360 kilometr qərbdə yerləşir. Azərbaycanın ikinci ən böyük sənaye şəhəri sayılır. Əhalisi 400 minə yaxındır.
