Azərbaycan, Bakı /müx. Trend Ü.İsmayılova/ 2006-cı ilin sonlarından Lənkəranda inşa edilən regional aeroport 2007-ci ildə istismara veriləcək. Bu barədə çərşənbə günü Bakıda keçirilən "Caspian Air Cargo Summit-2007" ikigünlük sammitində AZAL Dövlət Konserninin prezidenti Cahangir Əsgərov məlumat verib.
Əsgərovun sözlərinə görə, AZAL Lənkəranda ciddi problemlə üzləşib. Həmin problem qrunt sularının çoxluğu ilə bağlı olub. Bu üzdən də işlərin davam etdirilməsi üçün xüsusi texnologiyanın tətbiqinə zərurət yaranıb.
"Bu ilin sentyabrınadək uçuş zolağının inşası planlaşdırılır. Noyabr ayında isə bütün işlərin tamamlanması gözlənilir" - deyə o qeyd edib.
AZAL-ın vitse-prezidenti Sabir İlyasovun bu yaxınlarda verdiyi məlumata görə, Lənkərandakı hava limanının yenidən qurulması proqramı 20 mln. manat həcmində dəyərləndirilir. Regional aeroport əsasən yük daşımaları üçün nəzərdə tutulur. Bununla belə obyekt saatda 150 sərnişinə xidmət göstərə biləcək.
Məlumat üçün bildirək ki, 2006-cı ilin sonlarında həmçinin Zaqatalada yeni regional aeroportun inşasına başlanılıb. Burada da işlər hələ ki, davam etdirilir. Zaqatala hava limanının uçuş zolağının uzunluğu müasir standartlara çatdırılacaq. Aeroportun binası saatda 150 sərnişinə xidmət göstərmək imkanına malik olacaq.
Yeni hava limanında yük terminalının, yanacaq-sürtkü materialları anbarının, habelə maşın və mexanizmlərin təmiri üçün yerin inşası nəzərdə tutulur.